23

لہور: احتساب عدالت نے وزیر جنگلات سبطین خان دا 10 دیہاڑہ جسمانی ریمانڈ منظور کر لیا۔

نیب ولوں 15 دیہاڑہ جسمانی ریمانڈ دی درخواست کیتی گئی ۔ احتساب عدالت دے جج محمد وسیم اختر نے کیس دی سماعت کیتی۔ نیب پراسکیوٹر نے آکھیا میسرز ارتھ ریسورسز کمپنی رجسٹرڈ نہیں سی، ایس کمپنی دا کوئی رجسٹرڈ دفتر وی موجود نہیں سی، پنجاب منرل ڈویلپمنٹ اتھارٹی نال ارتھ ریسورسز کمپنی دا جوائنٹ وینچر کر دتا گیا، سبطین خان پنجاب منرل ڈویلپمنٹ اتھارٹی دے چیئرمین وی سن۔
نیب وکیل نے اپنے دلائل وچ ہور آکھیا کہ ملزم سبطین خان نے غیر قانونی طور تے میسرز ارتھ ریسورس کمپنی دے جوائنٹ وینچر دی منظوری دتی، قانون جوائنٹ وینچر دی اجازت نہیں دیندا سی، کمپنی دا ٹوٹل سرمایہ 25 لکھ سی جہدی دستاویزات وی جعلی سن۔ یاد رہوے کہ پچھلے دیہاڑ پاکستان تحریک انصاف دے ایم پی اے تے صوبائی وزیر جنگلات سبطین خان نوں گرفتار کیتا سی۔
ذرائع دے مطابق صوبائی وزیر سبطین خان تے چنیوٹ وچ غیر قانونی ٹھیکیاں دا الزام اے۔ اوہناں نے 2007ء وچ بطور وزیر چنیوٹ وچ معدنی وسائل دا ٹھیکہ دتا۔ اوہناں تے بطور وزیر مائنز اینڈ منرلز ارباں روپے دے ٹھیکے دین دا الزم اے۔ ملزم تے ارباں روپے مالیت دے 500 میٹرک ٹن آئرن دا ٹھیکہ دین دا الزا م اے۔ ایس ویلے وزیر اعلیٰ پنجاب چوہدری پرویز الہیٰ سن۔

ایس خبر تے اپنی رائے دا اظہار کرو

اپنا تبصرہ بھیجیں